الخلع ولا الطلاق أيهما أفضل

الخلع ولا الطلاق أيهما أفضل، سؤال كتير بيتبعت لينا وللاجابه عليه لازم نوضح الفرق بينهم وعلي حسب ظروفك هتقدري تختاري وتحددي ايه المناسب لظروفك وامكانياتك ، وفي التقرير التالي يجيب مستشارك القانوني ، خلع ولا الطلاق أيهما أفضل.

اولا من حيث الوقت والمده في المحكمة

الخلع

اسرع ومدته في المحكمة من ثلاثه شهور لخمسه كاعد اقصي لأن الحكم فيه نهائي مفهوش استئناف

الطلاق للضرر

بتوصل مدته في المحكمه ل10او11 شهر لانه بيبقي فيه استئناف

ثانيا من حيث الأسباب

الخلع

مش  لازم يبقي فيه أسباب لقبول دعوي الخلع يكفي فقط إقرار الزوجه بخشيتها الا تقيم حدود الله

الطلاق للضرر

لابد من وجود أسباب لقبول دعوي الطلاق للضرر والاسباب دي لابد من اثباتها يا اما بشهاده الشهود او محاضر او قضايا بين الزوجين او تقارير طبيه في حاله وجود مشكله صحيه

ثالثا من حيث الحقوق

الخلع

الزوجة بتتنازل فيه عن مؤخر الصداق ونفقه المتعه والعده وبترد للزوج مقدم الصداق المكتوب في قسيمه الزواج وبتحتفظ بقايمه المنقولات وفي حاله وجود اطفال ليها الحضانه وكل الحقوق المتعلقه بهم من تمكين من مسكن الزوجيه بصفتها الام الحاضنه او اجر مسكن  ونفقه شامله ماكل وملبس وبدل فرش وغطا ومصاريف تعليم وعلاج

الطلاق للضرر الزوجه بتاخد فيه كل حقوقها من مؤخر الصداق المكتوب في قسيمه الزواج ونفقه متعه كاحد ادني سنتين ونفقه عده ثلاثه شهور وقايمه المنقولات بالإضافة الي  حقوق الاطفال ليها الحضانه وكل الحقوق المتعلقه بهم من تمكين من مسكن الزوجيه بصفتها الام الحاضنه او اجر مسكن  ونفقه شامله ماكل وملبس وبدل فرش وغطا ومصاريف تعليم وعلاج